ကျောင်းသားများတစ်နေ့တာ
ကျောင်းသားများ၏ တစ်နေ့တာသည် ကျယ်ပြန့်လှသော တက္ကသိုလ် ပရဝုဏ်တွင် အဆောင်မှ စာသင်ခန်း၊ စာသင်ခန်းတစ်ခုမှ တစ်ခု ပြေးလွှားရင်း သက်ဝင် လှုပ်ရှားလျက်ရှိပါသည်။ စာသင်ချိန်မှာ နံနက် (၇)နာရီမှ (၁၀)နာရီ၊ နေ့ခင်း (၁)နာရီမှ (၅)နာရီအထိ ဖြစ်ပြီး နေ့စဉ် ညနေ (၆)နာရီမှ (၇)နာရီအထိသည် ဘုရားရှိခိုး၊ တရားမှတ်ချိန် ဖြစ်ပါသည်။ နံနက် (၅:၃၀)နာရီသည် နံနက်စာ စားချိန်ဖြစ်ပြီး၊ နံနက် (၁၀:၃၀)သည် နေ့ဆွမ်းစားချိန် ဖြစ်ပါသည်။ ဘုရားရှိခိုးပြီးနောက်ပိုင်း အချိန်သည် အချို့ကျောင်းသားများအတွက် စာလေ့လာချိန်၊ အချို့အတွက် ဆွေးနွေးပွဲများ၊ အပတ်စဉ် ကျောင်းသား စာတမ်းဖတ်ပွဲများ စသည်တို့ကို ပြုလုပ်နိုင်သော အချိန် ဖြစ်ပါသည်။
